زجل :آخر قصائد الفاجومي/ أحمد فؤاد نجم

آخر قصائد الفاجومى

عزيزى حماده بتاع النضال
يا واجع دماغنا وغاوى الحلال
نصيحة يا صاحبي بلاش الخيال
وغمض عيونك وربّي العيال
***
بلاش المقاوحة وكشف العيوب
وسيب المقاومة ونار الحروب
ليصبح ملفك صحيفة ذنوب
وتدخل برجلك طريق الزوال
***
بلاش المناكفة ولايم .. وعيش
ح تتعب معانا وسهمك يطيش
نلفق لأهلك قضية حشيش
وتصبح حكاية ونكتة ومثال
***
حتصبح شيوعي .. حتصبح حقير
وكلب وحرامي وندل وأجير
ونقدر نلخبط .. في أصلك كتير
وجدك ” شحاته” حيصبح شاحال
***
حنحلف بإن الحبايب شافوك
بتقبض يا خاين وتقتل أخوك
مراتك ساعتها ح حتلعن أبوك
وتلطم وتشتم احط الرجال
***
تعالا وهاودنا وعدّى الأمور
وعيش في الطراوه وخش الطبور
وشكلك حتزعل ودمك يفور
ح تشهد نهايتك في بحر الرمال
***
تنخور ورانا حنزعل صحيح
وخليك في حالك ما تبقاش قبيح
ولو كان لسانك مناكف فصيح
معانا عساكر يهدو الجبال
***
فخليك مؤدب وخليك لذيذ
دا احنا الحكومة وانتو المعيز
ورثنا التكية عن الانجليز
فليه المناهده وليه السؤال
***
ما لكش انت دعوة بإيه اللى ضاع
ومين اللى شارى ومين اللى باع
ومين اللى يشبع ومين اللى جاع
ومن اللى كيل ومين اللى شال
***
عزيزى حماده بتاع النضال
يا واجع دماغنا وغاوى الحلال
نصيحة يا صاحبى بلاش الخيال
وغمض عيونك وربى العيال
***
أحمد فؤاد نجم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.